Staatsvisite zu Lëtzebuerg vum President vun der Republik Cabo Verde, José Maria Neves, a senger Fra Débora Katisa Carvalho - Drëtten Dag

Donneschdeg, den 25. Mee 2023

De 25. Mee wäert d'Presidentekoppel a Begleedung vu S.K.A. dem Groussherzog d'Pompzentral vun der Société électrique de l'Our (SEO), ee vun de wichtegste Kraaftwierker an Europa, zu Veianen besichen. A Presenz vum Minister fir Energie Claude Turmes, de President vun de SEO Georges Reding, dem Direkter Luc Reinig an dem Buergermeeschter vun der Stad Veianen, Claude Tonino, wäerten si de Kontrollzenter an déi ënnerierdesch Hiele mat 9 horizontale Waasserkraaftwierker besichen an Erklärungen iwwer de Fonctionnement, souwéi dem produzéierten a verbrauchte Stroum, kréien.

De Minister fir Energie Claude Turmes a säi kapverdianeschen Homolog Alexandre Dias Monteiro, wäerte vum Direkter Fränk Ries am Ettelbrécker Lycée empfaange ginn, dat eng Traditioun am Beräich vun den erneierbaren Energien an Ëmweltwëssenschaft kultivéiert. D'Ministere wäerten d'Geleeënheet hunn, de Schüler aus dem Lycée de Fonctionnement vu Projeten am Beräich vun den erneierbaren Energien am Cabo Verde resp. Lëtzebuerg virzestellen, d'Sujete vum Klima an Energie unzeschwätzen an de Square of renewable energy.

Den offizielle Programm gesäit ausserdeem eng Visitt vun der Hotelschoul (EHTL) zu Dikrech vir. De kapverdianesche Staatschef, seng Fra a S.K.A. de Groussherzog wäerte vum Claude Meisch, Minister fir Educatioun, Kanner a Jugend, dem Lex Delles, Minister fir Tourismus, dem Direkter vun der EHTL, Michel Lanners, der stellvertriedender Direktesch, Sylvie Pretti, souwéi dem Buergermeeschter vun der Stad Dikrech, Claude Thill, begréisst ginn. Sie wäerten d'Geleeënheet hunn, eng Rei vun den aktuellen a zukünfteg Projete vun der EHTL ze gesinn an dat ganzt an der Praxis z'erliewen: déi individuell Kichen, d'Spullkichen, den Urban Farming, d'Brigadkichen an d'Patisserie.

Uschléissend fënnt e Mëttegiesse statt, dat vun der EHTL am Restaurant vun der Schoul offréiert gëtt. De nei interpretéierte kapverdianesche Menü wäert vun de Schüler zoubereet an zerwéiert ginn, déi dobäi hiert Kënnen ënner Beweis stelle kënnen.

D'Staatsvisitt gëtt am fréien Nomëtteg mat der traditioneller Abschidszeremonie virum groussherzogleche Palais ofgeschloss, bei deem d'Presidentekoppel a S.K.A. de Groussherzog de Lëtzebuerger Autoritéiten an Delegatiounen Äddi soen.

D'Presidentekoppel wäert säi privaten Openthalt bis den Donneschdeg Nomëtteg verlängeren.

De José Maria Neves a seng Fra huelen op Invitatioun vun der Stad Lëtzebuerg um Dévoilement vun der Skulptur "Sodade" op der Place du Parc zu Bouneweg deel. Dëst Wierk symboliséiert 60 Joer Frëndschaft tëscht Lëtzebuerg an dem Cabo Verde a gouf der kapverdianescher Communautéit vun der Stad Lëtzebuerg a Presenz vu S.K.A. de Groussherzog geschenkt.

Géint Enn vum Dag fënnt am Centre culturel zu Hollerech een Treffen tëscht der Presidentekoppel an der kapverdianescher Communautéit, a Presenz vu S.K.A. de Groussherzog statt.

Communiqué vum Informatiouns- a Pressedéngscht