National Plangung: Opnam vun de Persounen, déi internationale Schutz ufroen (demandeurs de protection internationale, DPIen)

Aleedung

© Thinkstock/Getty Images/iStockphoto/Michail_Petrov-96, all Rechter virbehalen

 

Géigeniwwer vun der aktueller Migratiounskris stëtzt sech d'Empfangs- an d'Integratiounspolitik vun der Regierung op dräi Pilieren:

  • Opnam an Ënnerbréngung;
  • Bildung;
  • Gesondheet.

Als Reaktioun op den Zoulaf vun de Flüchtlingen an Europa an zu Lëtzebuerg huet de Regierungsrot, dee sech de 24. Juli 2015 op Ufro vum Ministère fir Famill, Integratioun an d'Groussregioun versammelt huet, dem Héije Kommissariat fir national Sécherheet (Haut-commissariat à la protection nationale, HCPN) e Mandat fir d'Ëmsetzung vun engem Noutfallplang fir d'Opnam vun de Persounen, déi internationale Schutz ufroen (DPIen) iwwerlooss.

Doru schafft den HCPN zesumme mam Lëtzebuerger Office fir Opnam an Integratioun (Office luxembourgeois de l’accueil et de l’intégration, OLAI) an an enker Zesummenaarbecht mat enger ganzer Rei Acteuren.

Den Asaz steet am Aklang mam Wonsch, eng responsabel a solidaresch Migratiounspolitik ze féieren, fir en ugepasst Encadrement an eng adequat Betreiung fir all Flüchtling, deen zu Lëtzebuerg ukënnt, ze garantéieren.

Koordinatioun vun den Aarbechten

  • Koordinatiounsgrupp

    Fir d'Aarbecht effikass ze koordinéieren, gouf eng Koordinatiounsgrupp geschaaft. Ënnert der Leedung vun engem Vertrieder vum Ministère fir Famill, Integratioun an d'Groussregioun a vum HCPN ass dës Grupp fir de Suivi vun der Plangung vun der dréngender Opnam vun DPIen zoustänneg.

    Aussen- an Europaministère – Immigratiounsdirektioun; Finanzministère: Acquisitiounscomité, Finanzkontrollsdirektioun, Finanzinspektioun; Ministère fir nohalteg Entwécklung an Infrastruktur: Transportsdepartement, Departement fir Raumplangung, Ëmweltdepartement, Verwaltung fir ëffentlech Bauten (ABP); Ministère fir bannenzeg Sécherheet; Inneministère; Ministère fir Educatioun, Kanner a Jugend; Gesondheetsministère – Gesondheetsdirektioun; Lëtzebuerger Office fir Opnam an Integratioun (OLAI); Verwaltung vun de Rettungsdéngschter (ASS); Informatiouns- a Pressedéngscht (SIP); Arméi; Douane; Groussherzoglech Police; Héichkommissariat fir national Sécherheet (HCPN); extern Experten: d'Rout-Kräiz, Caritas.

  • Bewäertungszell fir den Zoulaf vun DPIen

    Dës Zell gëtt vum OLAI geleet an ass zoustänneg fir de permanente Suivi vun der Zoulafsituatioun a Bezuch op DPIen.

    Se setzt sech aus Vertrieder vun der Immigratiounsdirektioun, dem OLAI an dem HCPN zesummen.

  • Logistikszell

    Dës Zell gëtt vun der Verwaltung vun de Rettungsdéngschter (ASS) geleet an ass fir d'Koordinatioun vun den Installatiouns- an Ariichtungsaarbechte vun den Opnamestrukturen zoustänneg, déi fir den aktuellen Zoulaf vu Flüchtlingen noutwenneg sinn.

    Se setzt sech aus Vertrieder vun der ASS, der Verwaltung fir ëffentlech Bauten, der Arméi, dem OLAI an dem HCPN zesummen.

Empfangspolitik

Lëtzebuerger Office fir Opnam an Integratioun (OLAI)

D'Opnam- an d'Integratiounspolitik vun den neie bäigezunnen Auslänner gëtt vum OLAI ëmgesat a koordinéiert. D'Missioun vum OLAI ass ë.a. en nationalen Aktiounsplang fir d'Integratioun opzestellen a géint Diskriminatiounen ze kämpfen, an den Opnam- an Integratiounskontrakt ze realiséieren an ze verwalten.

D'OLAI ass déi zoustänneg Instanz, fir sech ëm d'Opnam an d'Ënnerbréngung vun den Demandeure fir internationale Schutz (DPIen) ze këmmeren.

All Persoun, déi eng Ufro fir internationale Schutz dem Grand-Duché stellt, däerf während der Dauer vun der Prozedur vu materiellen Hëllefsmëttele profitéieren, wéi d'Bereetstellung vun enger Ënnerbréngung, d'Moolzechten- oder d'Liewensmëttelversuergung oder och nach d'medizinesch Grondversuergung. Et ass den OLAI, dee sech ëm d'Bereetstellung vu materieller Hëllef këmmert. Dozou ass en och zoustänneg fir den soziale Suivi an d'pedagogescht Encadrement vun den DPIen, déi an Ënnerkonftsstrukture liewen.

An engem Deel vun den Ënnerkonftsstrukturen huet den OLAI d'deeglech Gestioun an den soziale Suivi vun den DPIen, déi do liewen, conventionnéierte Partneren iwwerlooss, virun allem d'Rout-Kräiz a Caritas.

Schliesslech huet den OLAI d'Autorisatioun fir d'Verwaltung vun den Ënnerkonftsstrukture fir de provisoreschen Openthalt vun DPIen an och fir d'Promotioun vum Bau a vun der Opriichtung vun dëse Strukturen, an dat, an Zesummenaarbecht mat den zoustännegen Instanzen.

Ufrosprozedur fir den internationale Schutz

Dem Asylrecht no erkennt Lëtzebuerg haaptsächlech zwee international Schutzstatussen un: de Flüchtlingsstatus an de subsidiäre Schutzstatus.

En plus vun dësen zwee Schutzstatusse gëtt et nach een temporäre Schutz vu méi aussergewéinlecher Natur. Dëse gëtt am Fall vun engem Massenzoulaf vu Leit, déi hiert Land op eemol hu misse verloossen, zougedeelt.

De Flüchtlingsservice vun der Immigratiounsdirektioun vum Aussen- an Europaministère ass fir d'Registréieren, d'Beaarbechtung an d'Beuerteelung vun den Ufroe fir den internationale Schutz zoustänneg.

Ënnerbréngung

Doduerch, dass déi permanent Ënnerbréngungsstrukture fir Persounen, déi den internationale Schutz ufroen (DPIen), am September/Oktober 2015 komplett iwwerfëllt waren, huet missen eng provisoresch Léisung fir d'Opnam fonnt ginn, fir déi bestoend Strukturen z'ergänzen. Sou gouf den HCPN vum Regierungsrot, dee sech de 24. Juli 2015 op Ufro vum Ministère fir Famill, Integratioun an d'Groussregioun versammelt huet, mat engem Mandat fir d'Ëmsetzung vun engem Noutfallplang fir d'Opnam vun den DPIe beoptraagt.

Den HCPN huet zesumme mam OLAI geschafft an an enker Zesummenaarbecht mat enger ganzer Rei Acteuren, sou dass de Regierungsrot, a senger Sëtzung vum 11. September 2015, déi éischt Phas vun dëser Plangung approuvéiert huet.

Doropshi goufen zwou Kategorië vun Éischtopnamezentren (CPA) geschaaft:

  • kuerzfristeg: Ariichtung an Aktivéierung vun CPAen innerhalb vun zimlech kuerzer Zäit;
  • mëttelfristeg: Schafung vu "Containerdierfer" ab Mëtt 2016.

Den HCPN koordinéiert d'Identifizéierung, d'Ariichtung an d'Ausrüstung vun de CPAen an Zesummenaarbecht mam OLAI, der ASS (kuerzfristeg) an der Verwaltung fir ëffentlech Bauten (ABP) (mëttelfristeg).

Den OLAI, an Zesummenaarbecht mat senge Partneren (d'Rout-Kräiz, Caritas, asw.), këmmert sech ëm d'Exploitatioun vun den CPAen an d'Encadrement vun den DPIen.

Disponibel Infrastrukturen zanter September 2015:

Bis d'Installatioun vun de sougenannte Containerdierfer goufen direkt am September kuerzfristeg disponibel CPAen ageriicht.

An deem Sënn si fënnef Sitten asazbereet:

  • Stroossen: alen Zenter fir Logopedie;
  • Stad Lëtzebuerg: al Maternité vum Centre hospitalier de Luxembourg (Fligel op der Säit vun der Arelerstrooss);
  • Ettelbréck: Gebai B vum Centre hospitalier neuropsychiatrique (CHNP);
  • Miersch: ale Comptageservice vu CREOS/ENOVOS;
  • Monnerech: alen EDIFF-Zenter

D'Sich no zousätzlechen Infrastrukture fir déi kuerzfristeg Opnam vun DPIe gëtt duerch déi kompetent Autoritéite weidergefouert.

Containerdierfer:

  • Aalt Altersheem zu Zolwer: Ouverture vum Site den 15. August 2017.
  • Dikrech – Härebierg: Dëse Site ass Enn 2016 opgaangen.
  • Esch-Uelzecht: D'Erëffnung vum Site ass fir d'Fréijoer 2018 virgesinn.
  • POS DPI Marnach: Et gouf decidéiert ze waarden, bis datt de Gesetzprojet iwwert d'Landesplanung (Gesetzprojet Nr. 7065) a Kraaft trëtt, well nom Avis vum Regierungsrot vum 24. Oktober 2017 ginn et nach punktuell Ännerunge fir dëse Gesetzprojet.
  • POS DPI Mamer: D'Plädoyere fannen den 16. Oktober 2017 statt. D'Uerteel sollt net virum Ufank vum doropfolgende Joer falen.
  • POS DPI Jonglënster: Den 28. September ass en Uerteel gefall, dat d'groussherzoglecht Reglement vum 15. Mäerz 2016, dat den POS DPI Jonglënster als obligatoresch bestëmmt huet, annuléiert.
    D'Riichter vum Verwaltungsgeriicht erwähnen dofir de Begrënnungsmangel vum Noutfall, deen als Grondlag fir d'Adaptioun vum groussherzogleche Reglement benotzt ginn ass.
    D'Sich no zousätzleche Sitte fir d'Ariichtung vu Containerdierfer gëtt duerch déi zoustänneg Autoritéite weidergefouert.

Bildung

Scolariséierung vu Flüchtlingskanner, Inklusiv Bildung, Integratioun vun auslännesche Schüler

Wéinst der besonnescher Situatioun vun den DPI-Kanner, déi sech duerch d'Onsécherheet vun hirer Openthaltsdauer an den nidderege Bildungsniveau och a fortgeschrattenem Alter auszeechnen, huet de Ministère fir Educatioun, Kanner a Jugend, am Aklang mat der Direktiv 2013/33/EU vum Europäesche Parlament a vum Rot vum 26. Juni 2013 betreffend Norme fir d'Opnam vu Persounen, déi den internationale Schutz ufroen (Art. 14), zwou d'selwecht wichteg Prioritéiten, ob d'Kanner an d'Jugendlecher hei bleiwen oder zeréck an hiert Heemechtsland ginn:

  • de Kanner, sou wäit wéi méiglech, e Gefill vu Stabilitéit a Sécherheet vermëttelen an hinnen erméiglechen, en normaalt Liewen ze féiere wéi all aner Kanner a Jugendlecher och;
  • garantéieren, dass se op d'mannst eng vun eise Kommunikatiounssprooche léieren, dermat se mat deenen anere Kanner kommunizéieren a mat hirer Ausbildung virufuere kënnen. D'Kenntnis vun enger oder méi Friemsproochen ass eng Noutwennegkeet am Fall vun enger Schoulausbildung zu Lëtzebuerg an ass och e Virdeel am Fall, wou si an hiert Land zeréckginn.

Disponibel Servicer/Moossnamen:

  • Um Niveau vum Ministère fir Educatioun, Kanner a Jugend:
    • de Scolariséierungsservice fir auslännesch Kanner (SECAM) koordinéiert Moossname fir d'Integratioun vun all den auslännesche Schüler onofhängeg vum Status vun hiren Elteren a bidden de Schüler, de friemsproochegen Elteren an den Enseignanten, déi dës Schüler an hir Klassen ophuelen, Ënnerstëtzung duerch verschidden Hëllefsprojeten a -servicer;
    • d'Cellule d’accueil scolaire pour élèves nouveaux arrivants (CASNA),eng zentral Empfangs- an Orientéierungszell fir nei bäigezunne Schüler vum SECAM, gëtt Informatiounen op verschidde Sproochen iwwert de lëtzebuergesche Schoulsystem an déi virgesinnen Hëllefsmoossname fir all déi nei bäigezunne Schüler, Kanner vun DPIe mat abegraff. All déi nei bäigezunne Schüler (12-24 Joer) mussen duerch d'CASNA, dermat si an enger fir si gëeegent Schoul scolariséiert kënne ginn;
    • am Kader vum Massenzoulaf vun DPIen am Hierscht 2015 huet de MENJE eng "Task Force Flüchtlinge" geschaaft, déi fir d'Koordinatioun vun de verschiddenen Initiative vum MENJE fir DPI-Kanner zoustänneg ass.
  • Um Niveau vun der Grondschoul (Spillschoul a Primärschoul):
    • Duerch den Artikel 17 vum groussherzogleche Reglement vum 16. Juni 2009 dat d'Fonctionnement vun den Accueilscoursen an den Accueilsklasse fir d'Kanner, déi nei am Land installéiert sinn, bestëmmt, kënnen Accueilsklasse vum Staat ageriicht ginn am Fall vun aussergewéinleche Bedierfnisser, déi aus dem kommunale Kader stinn.
    • Säit dem Massenzoulaf ginn et staatlech spezialiséiert Accueilsklassen (CSAE) fir DPI-Kanner a munch Containerdierfer an och a Schoulen.
    • Sou wäit et méiglech ass, ginn d'Kanner an eng normal Klass no engem Schouljoer an enger CSAE-Klass.
  • Um Niveau vum Secondaire:
    • déi jonk DPIen, déi a Containerdierfer oder aner Opnamestrukture liewen, ginn normalerweis héchstens ee Joer laang an eng Accueilsklass an deen nooste Lycée;
    • et ginn "Accueilsklassen", déi an Applikatioun vum Artikel 9 vum Gesetz vum 25. Juni 2004 betreffend d'Organisatioun vun de Lycéeën an den technesche Lycéeë gegrënnt goufen. D'Accueilsklassen erméiglechen et, der grousser Heterogenitéit vun den nei bäigezunne Schüler entgéint ze kommen. Déi ënnerschiddlech viregt Schoulparcourse verlaangen differenzéiert, adaptéiert a flexibel Unterrechtsmethoden. Dofir bidden d'Accueilsklassen e Schoulprogramm, deen den individuelle Besoine vun de Schüler ugepasst ass an op de Programm vun den Aféierungsklasse vum ënneschten Zyklus vum technesche Secondaire (EST) baséiert.
      • ACCU- (12-15 Joer) an ACCU+-Klassen (12-15 Joer): fir Jugendlecher, déi fäeg sinn, en Niveau z'erreechen, dee gutt genuch ass, fir en optimalen Iwwergang an den normale System ze garantéieren;
      • CLIJA-Klassen (16 Joer);
      • CLIJA+-Klassen (17-24 Joer);
    • speziell Klassen: Aféierungsklassen (ënneschten Zyklus) an Ausbildunge mat enger spezieller Sproochregelung (RLS) (mëttelsten an ieweschten Zyklus), international Offer am Secondaire a Klassen, déi op den internationale Premièresexamen am allgemenge Secondaire virbereeden.
  • Um Niveau vum Encadrement ausserhalb vun de Schoulzäiten (3-17 Joer): am Kader vun de Conventioune mat de Verwalter vun Accueilsstrukture fir DPIen (d'Rout-Kräiz, Caritas) ginn d'Kanner an d'Jugendlecher ausserhalb vun de Schoulzäiten op der Plaz betreit.
  • Net begleet Mannerjäreger (MNA): Fir e regelméissege Suivi vun den MNAen ze garantéieren, informéiert eis den Aussen- an Europaministère regelméisseg iwwert d'Identitéit vun den MNAen, déi am Land ukommen an eng Ufro fir den internationale Schutz maachen. Dës MNAe ginn, sou wäit wéi méiglech, a speziell fir si ageriicht Opnamestrukture placéiert.
  • Ressourcen, déi fir d'Enseignantë bereetgestallt ginn:
    • den Encadrement an de Suivi vun den Enseignanten duerch Fachleit, speziell dofir agestallt (Schoulmeeschter oder Joffer, verbonne mam Ministère fir Educatioun, Kanner a Jugend, zousätzlech Mataarbechter fir d'CASNA);
    • interkulturell Mediateuren : 62 interkulturell Mediateure fir 29 verschidde Sproochen;
    • spezifesch Weiderbildung fir d'Enseignanten an aner Schoul-Acteuren.
  • Zesummenaarbecht am Netz: Fir eng qualitativ Opnam an en adaptéierte schoulesche Suivi vun de Kanner an de Jugendlechen, déi internationale Schutz ufroen, ze garantéieren, koordinéiert de SECAM wëchentlech an/oder méintlech Versammlunge mam OLAI, mat ONGen, mat der vum HCPN ageriicht Logistikszell sou wéi mat de fir de Schoultransport zoustännege Servicer an hëlt dorunner deel.
  • Projet "Begleeten Integratiounsparcours" (PIA): D'Regierung féiert de PIA fir d'DPIen a fir d'Persoune mat internationalem Schutzstatus (BPIen) an. En ass fir DPIen tëschent 18 a 65 Joer obligatoresch. E baséiert um Prinzip, dass eng gutt virbereet Integratioun op zwee Elementer berout:
    • d'Léiere vun op d'mannst enger vun de Gebrauchssproochen aus dem Land;
    • d'Verstoe vum Alldag zu Lëtzebuerg.

    Et ginn 3 Phasen:

    1. 16 Stonnen (Lëtzebuergeschcoursen an Aféierung an den Alldag) (obligatoresch);
    2. 80 – 120 Stonne Franséisch oder schoulesch Ausbildung (CLIJA+ fir 18- bis 24-Järeger) (obligatoresch);
    3. thematesch Sëtzunge fir BPIen.

Sproochlech Integratioun 1 a Sproochlech Integratioun 2, ugebuede vum Service fir d'Formatioun vun Erwuessener

Am Kader vum Projet Begleeten Integratiounsparcours (PIA) ass de Ministère fir Educatioun, Kanner a Jugend an Zesummenaarbecht mam Ministère fir Famill, Integratioun an d'Groussregioun zoustänneg fir d'Volete Sproochlech Formatioun an Orientéierung op Formatioun fir Erwuessener. Sproochlech Integratioun 1 (IL1) a Sproochlech Integratioun 2 (IL2) riichte sech u kierzlech bäigezunne Persounen a Persounen, déi internationale Schutz ufroen (DPIen).

Am Kader vum PIA geet de Service fir d'Formatioun vun Erwuessener folgendermoosse vir:

  1. D'IL1-Coursen zilen op d'Erklärung vun der sproochlecher Situatioun zu Lëtzebuerg a vu sengem Schoulsystem sou wéi op en éischte Kontakt mat der lëtzebuergescher Sprooch (Hëllefsmëttel: 100 Wierder Lëtzebuergesch). Dat perséinlecht Encadrement vun de Participanten erméiglecht den nei bäigezunne Persounen, sech am Schoul- a Beruffssystem anzeuerdnen.
     
  2. D'Gestaltung vun engem Portfolio mat all eenzelner DPI erméiglecht, hire schouleschen an/oder beruffleche Parcours ze dokumentéieren. D'Besoinen an d'sproochlech Kompetenze ginn individuell opgedeckt, fir op Basis vun den eegene Kompetenzen an der Léierfäegkeet vun de Participanten dës op Coursë vun der Erwuesseformatioun z'orientéieren. D'Offer setzt sech aus Alphabetiséierungscoursen, Franséischcoursen oder aner Sproochecoursen, Integratiounsklasse fir jonk Erwuessener an de Lycéeën oder 9e-Integratiounsklasse fir Erwuessener zesummen. De Service fir d'Formatioun vun Erwuessener huet och e Projet mat 9e-Klasse gestart, bei deem d'Léieren a konventionellem Unterrecht mat Aarbechtssituatiounen an Ateliere kombinéiert gëtt.
     
  3. Am Kader vun den IL2-Coursen organiséiert de Service fir d'Formatioun vun Erwuessener Alphabetiséierungscoursen an A1-Franséischintensivcoursen, déi sech un DPIe riichten, fir d'Sproochecoursenoffer zu Lëtzebuerg z'ergänzen. D'Entwécklung vun de sproochleche Kompetenzen ass e wichtegt Element fir eng gelongen Integratioun a verbessert wesentlech d'Chancë vun de Participanten op eng Ustellung.
     
  4. No den IL2-Coursë gëtt mat all Participant eng zweet Sëtzung fir perséinlech Berodungszwecker organiséiert. D'Orientéierung op Alphabetiséierungscoursen, Sproochecoursen, 9e Klasse fir Erwuessener oder op eng Héichschoulausbildung kann optimiséiert ginn, wann d'Léierfäegkeet an d'berufflech Projete vun den DPIen oder BPIen mat abezu ginn.

D'allgemengt Zil ass, d'Participanten an e guidéierte Léierprozess vun de Landessproochen anzebannen, déi eng zolidd Grondlag fir déi sozial a berufflech Integratioun duerstellen. D'individuell Berodung a Bezuch op eng fir de Participant gëeegent Bildungsoffer ass e wichtegt Element vun all schouleschem/berufflechem Parcours zu Lëtzebuerg.

Gesondheet

D'Regierung huet sech verflicht, fir all Flüchtling, deen op lëtzebuergeschem Territoire ukënnt, eng adequat gesondheetlech a medezinesch Prise-en-charge ze garantéieren. De gläichberechtegten Zougang zum Gesondheetssystem fir Flüchtlinge gëtt sou dank medezineschen Untersuchungen, Impfungen an noutfallmedezinesch Betreiung geséchert. Ausserdeem gouf decidéiert, d'Capacitéite vun de Gesondheetsinfrastrukturen ze stäerken, fir souwuel den aktuelle wéi de laangfristegen Zoulaf sou gutt wéi méiglech ze geréieren.

All nei bäigezunne Persoun muss duerch eng medezinesch Untersuchung vun engem Dokter vun der Gesondheetsdirektioun, ënner anerem vun der Gesondheetsinspektioun, déi vum Gesondheetsminister dofir delegéiert gouf; dëst geschitt an Zesummenaarbecht mam Centre médico-social. Falls noutwenneg organiséiert den OLAI an Zesummenaarbecht mat der Gesondheetsinspektioun d'medezinesch Betreiung vun de Flüchtlingen. Wann néideg begleeden Dolmetscher dës medezinesch Untersuchungen a Betreiung.

All DPI gëtt bei der Gesondheetskeess (CNS) affiliéiert a kann no enger Karenzzäit vun 3 Méint vun de Servicer vun der CNS profitéieren, genee wéi aner Awunner och.

Fir och laangfristeg de medezineschen a gesondheetleche Suivi vun den nei bäigezunnen DPIen ze garantéieren, gëtt d'Gesondheetsdirektioun gestäerkt.

Medezinesch-sozial a psychologesch Opnam a Missioun vun der ëffentlecher Gesondheet

Engersäits geet et drëm, eng adequat medezinesch-sozial a psychologesch Opnam fir all Flüchtling unzebidden, an anerersäits geet et och drëm, d'Missioun vun der ëffentlecher Gesondheet z'erfëllen, andeems de Risiko vun enger Importatioun vun Infektiounskrankheeten op e Minimum reduzéiert gëtt.

D'Gesondheetsinspektioun hat am Mee 2012 an Zesummenaarbecht mam OLAI mat der Gesondheetskontroll vun de Flüchtlingen ugefaangen. Bei dëser Kontroll sollen déi eventuell Träger vun Infektiounskrankheeten entdeckt ginn. D'Gesetz vum 18. Dezember 2015 iwwert d'Opnam vu Persounen, déi internationale Schutz ufroen,huet déi gesetzlech Verflichtung fir DPIen agefouert, sech der Gesondheetskontroll z'ënnerwerfen.

An Zesummenaarbecht mat der Ligue médico-sociale gëtt en Depistage vu gesondheetleche Problemer duerchgefouert. Momentan besteet d'Gesondheetskontroll aus enger medezinescher Untersuchung, enger Broschtkuerfrëntgen, engem Hauttest, Bluttanalysen an enger Stullganguntersuchung. D'DPIe kréien dann och eng Impfung. Sou gi bal all d'Persounen bei der Arees zu Lëtzebuerg geimpft.

Psychologesch Betreiung

Eng ganz Rei DPIen, déi zu Lëtzebuerg ukommen, waren Zeie vu gewalttätegen Handlungen oder hunn traumatesch Erfarunge gemaach. Verschiddener leiden ënner psychesch Problemer a brauchen eng professionell psychologesch Betreiung. Dofir stellt d'Regierung déi néideg Moyene bereet, fir eng adaptéiert therapeutesch Betreiung unzebidden.

Aktualiéiten op gouvernement.lu (op Franséisch - Auswiel)

Legislatioun

  • Gesetzes- a Reglementstexter a Bezuch op Immigratioun an Asyl
Aktualiséiert