Biographie

De Lex Delles ass den 28. November 1984 gebuer a staamt vu Munneref.

Studium an Ausbildung

Nom Ofschloss vu sengem Secondairesstudium 2003 besicht de Lex Delles d'Universitéit Lëtzebuerg fir do Droit ze studéieren, bevir hien awer säin Ofschloss an der Pedagogik op der HERS (Haute École Robert Schuman) zu Virton (Belsch) mécht.

Regierungsfunktiounen

No de Chamberwale vum 14. Oktober 2018 trëtt de Lex Delles de 5. Dezember 2018 als Minister fir Mëttelstand an als Minister fir Tourismus an d'Koalitiounsregierung aus DP, LSAP an déi gréng an. 

Aner politesch Funktiounen

Getrei sengem Motto, "Näischt ass méi einfach wéi ze kritiséieren, besser awer et mécht een eppes", engagéiert de Lex Delles sech säit 2010 bei de Jonken Demokraten (JDL). Hie relancéiert d'Sektioun vun der JDL zu Munneref an d'Jonk Demokraten am Walbezierk Osten, déi hien och bis 2013 presidéiert. Zanter November 2015 ass de Lex Delles Vizepresident vun der DP.

2011 trëtt de Lex Delles fir d'éischte Kéier bei de Gemengewalen un a gëtt och direkt zum Schäffe vu Munneref gewielt. Am Januar 2014 gëtt de Lex Delles zum Buergermeeschter vu sengem Gebuertsuert ernannt.

Bei de Chamberwalen 2013 gëtt de Lex Delles an d'Chamber gewielt a gëtt 2014, am Alter vu 29 Joer, dee jéngsten Député-maire am Land. Bei de Gemengewalen 2017 kann hie säi Mandat als Buergermeeschter verdeedegen an hie besetzt dat Mandat bis zum Moment vu sengem Antrëtt an d'Regierung.

An der Chamber presidéiert de Lex Delles vun 2013 bis 2018 d'Kommissioun fir Educatioun, Kanner a Jugend. Weider ass hie Member vun der Kommissioun fir d'Fonction publique an d'Verwaltungsreform, vun der Kommissioun fir Landwirtschaft, Wäibau, ländlech Entwécklung a Konsumenteschutz, souwéi vun der Kommissioun fir Kultur.

De Lex Delles ass och Ersatzmember vun der Lëtzebuerger Delegatioun beim Interparlamentaresche Rot vum Benelux vun 2015 bis 2018.

Beruffstätegkeet

No senge Studie schafft de Lex Delles als Schoulmeeschter an der Grondschoul zu Lenneng.

Aktualiséiert