Interview avec le ministre des Classes moyennes, du Tourisme et du Logement, Fernand Boden dans le cadre de la Semaine du logement

RTL Radio Lëtzebuerg: Mir hu wuel de Moien net Zäit op all Problemer am Wunnengsbau anzegoen. Duerfir just e puer Stéchwierder erausgepickt, wou ech Iech géif biede Stellung ze huelen. D'Regierung huet jo an de leschte Joren vill an deem Domaine annoncéiert. Mä wat gouf dann ëmgesat? Zum Beispill 27.000 nei Wunnunitéite goufen anscheinend an de leschten zéng Joer geschaf. Mä dat ass jo awer e Fait, datt wann een d'Präisser vun Haiser an Terrainen an den Zeidonge kuckt, datt dat zum Deel net ze bezuelen ass. Zum Beispill war annoncéiert ginn, de Staat géif Terrainen op de Wunnengsmart bréngen, fir esou d'Präisser ze drécken. Wéi ass et dann elo domadder? De Xavier Bettel vun der DP hat dat jo schonn den 1. Abrëll an enger parlamentarescher Fro ugeschwat a krut awer keng Äntwert. Firwat?

Fernand Boden: Jo, de Xavier Bettel huet den éischten Abrëll eng Fro gestallt, wéivill Terrainen de Staat op de Maart ginn hätt. En huet d'Fro awer un de falsche Minister gestallt. Wëll et ass net de Wunnengsbauminister, deen zoustänneg ass fir d'Terrainen ze verkafen, mä een aneren. An de Fait ass esou, datt de Staat ganz vill Efforte gemaach huet, fir d'Offer ze vergréisseren. Virun allem huet de Staat selwer bei Belval-Ouest a Belval-Nord grouss Projeten annoncéiert, déi elo am gaange sinn ëmgesat ze ginn. Um Kierchbierg ass Wunnengsbau geschaf gi vum Staat selwer. De Staat huet dem Fonds de logement eng ganz Rei vun Terraine verkaf, wou de Fonds de logement Lotissementer dorop mécht. Et ass ganz normal, datt et schwéier ass fir ze soen, wéivill Haiser sinn elo op deenen Terraine gebaut ginn, well wann een en Terrain versicht ze lotisséieren, dat dauert eng gewëssen Zäit, an dat ass ee vun de Problemer, dee mir eben hunn, datt d'Prozedure leider Gottes zevill laang daueren, ier ee vum Projet aus hinn och konkret Lotissementer ka realiséieren. Duerfir ass jo och e Gesetz gemaach ginn, en neit Gesetz, iwwer den Aménagement communal, wou eben méi liicht Prozeduren a méi schnell Prozedure sollen an d'Wee geleet ginn, fir datt aus de Projetë méi schnell kënnen Haiser entstoen.

 Mä och wann de Staat elo Terraine schonn op de Maart bruecht huet oder wëll bréngen, also d'Präisser si jo awer nach net gefall, oder?

Fernand Boden: Dach, also et gesäit een, datt all déi Moossnamen, déi jo ergraff gi sinn, a mir hu jo versicht fir virun zwee, dräi Joer unzefänken, eng ganz aktiv Roll um Maart ze spillen, besonnesch déi ëffentlech Baupromoteuren. Normalerweis hu mir jo Méijoresprogrammer gehat, fir e subventionéierte Wunnengsbau. Do waren 4.500 Wunnengen virgesinn. Mir hunn elo e Programm opgeluecht, do sinn iwwer 10.800 Wunnengen virgesinn. Et gesäit een also, datt besonnesch de Fonds de logement, déi ëffentlech Bauträger, Efforte maachen, fir d'Offer ze vergréisseren.

  Déi zweet Saach, déi mir gemaach hunn, dat ass déi steierlech Moossnamen, déi mir ergraff hunn fir, datt Leit déi Terraine wëlle verkafen zu Wunnzwecker, datt déi am Fong déi Plus-valuen, déi se dodrobber maachen, datt déi zur Halschent besteiert gi vu virdrunn an esouguer a Lotissementer e Véierel vu virdrunn. Dat heescht: Et ass zäitlech begrenzt, och fir d'Leit ze encouragéieren elo Terrainen ze verkafen, wourop ka gebaut ginn. An et gesäit een, datt alleguer déi Moossnamen derzou gefouert hunn, datt zum Beispill am Loyerssecteur, datt do am leschte Joer d'Loyeren éischter erof gaange sinn. Dat heescht do ass eng Tendenz vu Berouegung. De Problem ass bei den Häiser, déi verkaf ginn, ass de Präis och am leschte Joer stabiliséiert ginn, mä d'Demande no Appartementer ass nach ganz grouss. Also bei den Appartementer, do ass d'Präisentwécklung nach no uewe gaangen. An duerfir musse mir versichen, fir weider déi Efforten ze maachen, weider d'Offer ze vergréisseren. Da, mengen ech, misste mir och e bëssen déi Präisspiral gedréckt kréien.

Dir hut et ugeschwat, d'Steieren. Wéi ass et dann mat enger seriöser Spekulatiounssteier fir ze verhënneren, datt d'Terrainen ze deier ginn, wat se jo elo scho sinn. Hei eng Remarque dozou vum Étienne Schneider, dem President vun der Biergerinitiative Wunnen, der Initiative déi sech fir bezuelbare Wunnraum asetzt. Hie seet zu der Baulandbesteierung.

Étienne Schneider (O-Toun): Do hate mir gemengt, déi misst een elo direkt aféieren, nodeem déi steierlech Mesuren den 01.01.2005 auslafen. Bon, do huet déi aktuell Regierung jo e Kompromëss fonnt, fir dat nach eng Kéier zwee Joer ze verlängeren. Do si mir eigentlech der Meenung, datt dat e Message an déi falsch Richtung eigentlech ass. Well mat de steierleche Mesurë bezuelen d'Spekulanten op hire Bénéfice, deen se maachen, nëmme méi ee Véierel vun de Steieren, déi se misste bezuelen. Dat heescht si ginn eigentlech belount fir hir Spekulatioun, déi si gemaach hunn, anstatt datt een se dofir bestrooft.

Ass dat esou? Geet dat an déi falsch Richtung?

Fernand Boden: Ech wonnere mech e bëssen iwwert d'Ausso vum Här Schneider. Hie war selwer dobäi. Bei de Koalitiounsverhandlunge waren se d'accord domat, datt ee soll versichen, fir den Ament emol d'Leit nach ze encouragéieren, déi Terrainen, déi se hunn, fir déi op de Maart ze ginn, datt dodrobber soll gebaut ginn, nodeem datt een déi steierlech Avantagen, déi se kréie bei Plus-valuen den Ament, déi Mannerbesteierung, datt een déi géif zwee Joer verlängeren, fir eben iwwer dee Wee ze kucken, fir méiglechst vill Terraine ganz schnell op de Maart ze kréien. An ech hu schonn dorop higewisen, datt Privatpromoteuren... Mir hunn duerch déi do Moossname vill méi Terrainen ugebuede kritt. A mir hoffen natierlech duerch d'Beschleunegung vun de Prozeduren och méiglechst schnell dodrobber Haiser stinn. Mä et ass awer och an der Regierungserklärung festgehale ginn, datt parallel elo gekuckt gëtt, mat de Gemengen zesummen, d'Problematik vun der Grondsteier ze iwwerdenken an ze iwwerkucken. Dir wësst, datt bei der Grondsteier net de Staat alleng kann décidéieren, datt d'Gemenge mat agebonne musse ginn an, de Staatsminister huet an der Regierungserklärung ganz kloer gesot, datt d'Spekulatiounssteier keen Tabu wär, datt dat géif ugepak ginn. A mir sinn och wëlles, dat ze maachen.

 A wéi wäit ass de Wunnengsbauminister bei der konkreter Ëmsetzung vum ominéisen IVL gefuerdert? Hei geet et jo ënnert anerem ëm Schaffen a Wunnen. Musse mir ëmdenken? Och beim Bauen?

  Fernand Boden: Ech géif soen, dat ass och an der leschter Regierungsperiod schonn ugeklongen, datt ee muss kucken deen Terrain, dee mir hunn, deen net vermehrbar ass, deen esou rationell an esou gutt wéi méiglech ze notzen. Besonnesch a gréisseren Agglomératioune muss méi dicht gebaut ginn, muss de Buedem méi rationell genotzt ginn. An duerfir ass jo och versicht ginn fir am Kader vum IVL och d'Wunnengsbauproblematik mat unzeschwätzen. Mir wëlle jo, datt och Wunnen, Bauen, Schaffen soll méi no beieneen kommen, datt Verkéiersweeër solle verkierzt ginn an duerfir ass och virgesinn, fir e Plan sectoriel Logement ze maachen. Dat heescht, den Observatoire de l'habitat ass am gaangen ze analyséieren, wou ass nach potentiell Bauland hei an Agglomératiounen, ouni datt mir mussen do eng Zersiedelung vun der Landschaft kréien, datt mir wëllen déi Agglomératiounen, déi do sinn, déi gréisser Uertschafte kucken, wat ass nach do vu Bauland do, datt dat opgelëscht gëtt. Dee Plan sectoriel Logement soll jo festhalen, wou kann an nächster Zäit gebaut ginn an et ass jo och virgesinn, datt mir och mat de Gemengen zesumme versichen, esou eng Aart Pakt ze maachen. Et ass jo eng Plattform Staat-Gemengen virgesinn, datt a gréissere Gemengen, déi ëntwécklungsfäheg sinn, an déi och bereet sinn, dee Wee matzegoen, datt do e Pakt gemaach gëtt fir ze kucken, wat komme vun Nofolgekäschten op déi Gemengen zou, wann se bereet sinn, datt gréisser Lotissementer op hirem Territoire gemaach ginn, an datt dann de Staat versicht déi Nofolgekäschten esou gutt wéi méiglech ze begleeden.

No der Kritik vu virdru vun der Initiative fir bezuelbare Wunnraum, dann awer och e bësse Luef nach vum Étienne Schneider. Am Ufank wier ee bei Iech op Onverständnis gestouss. Dir wäert der Meenung gewiescht, datt net jiddwereen eng eege Wunneng misst hunn.

  Étienne Schneider (O-Toun): Ech mengen awer datt an deene Joeren Dialog, déi mir elo haten, datt awer och säi Selbstverständnis vun der ganzer Geschicht awer e bësse geännert huet, sou datt ech hoffen an och mat all deem, wat elo am Koalitiounsaccord steet, datt do en neien Élan dra kënnt.

Dat heescht, déi Zesummenaarbecht wäert weider goen?

 Fernand Boden: Déi ass ganz gutt. An ech mengen, mir hunn net den Här Schneider gebraucht an d'Initiative fir bezuelbare Wunnraum gebraucht, fir der Meenung ze sinn, datt et wichteg ass, datt jiddfereen kann een Eegenheem kréien zu abordable Präisser. Dat ass e Grondrecht fir d'Bierger. Dat hu mir ëmmer nach versicht ze verteidegen an ech géif scho soen, datt déi Zësummenaarbecht, déi effektiv bestanen huet an déi elo hoffentlech och weider geet, datt déi soll derzou féieren, datt jiddfereen mat Hand upéckt, Staat, Gemengen, Privatpromoteuren, fir wéi gesot d'Offer ze vergréisseren. Mir hoffen, datt dann déi Präisspiral ka gedréckt ginn, an datt d'Wunnen an d'Bauen hei zu Lëtzebuerg erëm méi gënsteg gëtt.

 Fernand Boden, villmols Merci fir de Besuch de Moien am Studio.

  Fernand Boden: Gär geschitt.