Staatsvisitt vum President vun der Tschechescher Republik, Petr Pavel, a vu senger Fra Eva Pavlová zu Lëtzebuerg - 1. Dag

Donneschdeg, den 29. Februar 2023

De President vun der Tschechescher Republik a seng Fra ginn offiziell vum Grand-Duc a vun der Grand-Duchesse um Parvis vum groussherzogleche Palais empfaangen. No de militäreschen Éierungen, der Interpretatioun vun den Nationalhymne, der Revue vun den Truppen, der Presentatioun vun de jeeweilegen Autoritéiten an Delegatiounen, sou wéi dem Echange vu Kaddoen, ginn de Petr Pavel an d'Eva Pavlová fir eng Entrevue mat der groussherzoglecher Koppel am Palais empfaangen.

De Staatschef vun der Tschechescher Republik a seng Fra leeën dann a Presenz vum Premierminister Luc Frieden, vun der Verdeedegungsministesch Yuriko Backes, a vum Chef d'État-Major Steve Thull, e Blummekranz um Nationalmonument vun der Lëtzebuerger Solidaritéit néier. Beim Verloosse vun der Kapell, gréissen de Petr Pavel an d'Eva Pavlová Porte-Drapeauxen, Membere vum Comité fir d'Erënnerung un den Zweete Weltkrich souwéi Vertrieder vu patriotesche Beweegungen a Veräiner.

No sengem Retour an de Palais, huet den Tschechesche Staatschef noeneen eng Audienz mam President vun der Chamber, Claude Wiseler, dem Premierminister Luc Frieden, an dem Minister fir auswäerteg Ugeleeënheeten an Aussenhandel, Minister fir Entwécklungszesummenaarbecht an humanitär Ugeleeënheeten, Xavier Bettel.

Dono treffen de Petr Pavel an d'Eva Pavlová d'groussherzoglech Koppel fir e privat Mëttegiessen am Palais, wou si hir Gespréicher weiderféiere kënnen.

Am fréien Nomëtteg empfänkt d'Buergermeeschtesch Lydie Polfer, zesumme mam Schäfferot a Gemengerot, d'Presidentekoppel an de Grand-Duc an d'Grande-Duchesse fir eng akadeemesch Seance an der Stater Gemeng. Musikalesch encadréiert gëtt dat Ganzt vun engem Museksensembel aus dem Stater Conservatoire.

Um Programm steet dono d'Néierleeë vun enger Gerbe um Jan-Palach-Square vum President vun der Tschechescher Republik an dem Grand-Duc, a Presenz vun der Stater Buergermeeschtesch Lydie Polfer. De Jan-Palach-Square gëllt der Erënnerung un den tschechesche Student, deen den 11. August 1948 zu Prag gebuer ass, a sech de 16. Januar 1969 op der Venceslas Plaz zu Prag a Brand gesat hat, als symbolesche Resistenzakt géint d'Invasioun vun den Truppe vum Warschauer Pakt.

Den Tschecheschen an de Lëtzebuerger Staatschef leeën doropshin eng Gerbe um Graf vum Jang de Blannen néier, éier si d'Schëff vun der Kathedral a Presenz vun der Grande-Duchesse a der Madamm Eva Pavlová besichen. 1946, ganzer sechs Joerhonnerten no sengem Doud, goufen d'Iwwerreschter vum Jean I, Kinnek vu Béimen a Grof vu Lëtzebuerg, deen als Schlësselfigur déi tschechesch an déi lëtzebuergesch Geschicht verbënnt, an d'Krypta vun der Kathedral Notre-Dame vu Lëtzebuerg verluecht.

Am spéiden Nomëtteg sinn d'Presidentekoppel zesumme mat der groussherzoglecher Koppel am Betzder Schlass, Sëtz vun SES, wou si vun der Verdeedegungsministesch Yuriko Backes, an der delegéierter Ministesch beim Premierminister fir Medien a Connectivitéit, Elisabeth Margue, souwéi vu Vetrieder vun SES, empfaange ginn. No enger kuerzer Presentatioun vun den Aktivitéiten an Erklärungen zur Geschicht vun SES an zur strateegescher Visioun vun der Firma an hire Bezéiungen zur Tschechescher Republik, besichen d'Presidentekoppel an d'groussherzoglech Koppel de Kontrollzentrum vun de Satelliten. 

Als Ofschloss vum éischten Dag vun der Staatsvisitt ginn de Grand-Duc an d'Grande-Duchesse am Palais e Galadinner zu Éiere vum President vun der Tschechescher Republik, Petr Pavel, a senger Fra, Eva Pavlová, a Begleedung vum Ierfgroussherzog an der Ierfgroussherzogin.

Communiqué vum Informatiouns- a Pressedéngscht (SIP)