Staatsvisitt vum Grand-Duc a vun der Grande-Duchesse an der portugisescher Republik

 

Am Kader vun dëser Staatsvisitt, gouf déi groussherzoglech Koppel vun enger wichteger wirtschaftlecher Delegatioun begleet, déi aus Representantë vun zukunftsorientéierte Beräicher aus der Lëtzebuerger Wirtschaft zesummegesat ass: digital Wirtschaft, Weltraum, nohalteg Konstruktioun, Tourismus, Finanzservicer an nohalteg Finanzen, esou wéi Representantë aus verschidde kulturellen Institutiounen.

Et sief dorun erënnert, dass de Grand-Duc an d'Grande-Duchesse am September 2010 schonn eemol fir eng éischt Staatsvisitt a Portugal waren. Dës zweet Staatsvisitt - absolutt aussergewéinlech aus enger protokollarescher Siicht - ass en Zeeche vun den excellente bilaterale Relatiounen, déi tëschent Portugal a Lëtzebuerg bestinn.

 

Mëttwoch, den 11. Mee 2022

Zu Lissabon, gouf déi groussherzoglech Koppel offiziell vum portugisesche President, Marcelo Rebelo de Sousa, op der Praça do Império empfaangen, eng national Plaz mat grousser Symbolik, déi 1940 am Kontext vun der Expo vun der portugisescher Welt geschafe gouf, fir den 800 Joer Onofhängegkeet vu Portugal ze gedenken. No de militäreschen Éierungen an der Interpretatioun vun den Nationalhymnen, huet de Lëtzebuerger Staatschef d'Garde Revue passéiere gelooss. Dono sinn de Grand-Duc an d'Grande-Duchesse, a Begleedung vun der ministerieller Delegatioun, an d'Kierch Sainte-Marie am Klouschter vun de Hieronymite gaangen, fir e Blummekranz virum Grafstee vum Luís Vaz de Camões, dem bekanntste Poet aus Portugal, nidderzeleeën. Um Programm stoung dann och nach eng Visitt vun der Kierch a vum Klouschtergaart vum Klouschter vun de Hieronymiten, Symbol vu Lissabon an Zeie vum Räichtum vun de portugiseschen Entdeckungen uechter d'Welt. Dëst a Begleeedung vun der Direktesch, Dalila Rodrigues, a vum Kanoniker José Manuel Dos Santos Ferreira, Paschtouer vun der Kierch Sainte-Marie vu Belém.

Begleet vun der republikanescher Nationalgarde zu Päerd, goufen de Staatschef a seng Fra an de Palais vu Belém gefouert, déi offiziell Residenz vum President vun der portugisescher Republik. Hei goufen de Grand-Duc an d'Grande-Duchesse offiziell vum Marcelo Rebelo de Sousa empfaangen. No dësem Empfang, huet en Treffen tëschent der groussherzoglecher Koppel an dem President vun der Republik stattfonnt. No dësem Treffen, hunn déi zwee Staatscheffen un enger Reunioun mat de Ministere Jean Asselborn, Corinne Cahen, Franz Fayot a Yuriko Backes deelgeholl. Op der Dagesuerdnung stoungen Themen am Zesummenhang mat de bilaterale Relatiounen an de groussen Dossieren aus der politescher a wirtschaftlecher Aktualitéit an Europa. No der Reunioun war e privat Iesse vun der groussherzoglecher Koppel mam President vun der portugisescher Republik.

De Minister fir Entwécklungszesummenaarbecht an humanitär Ugeleeënheeten, Franz Fayot, hat sengersäits en Aarbechtsiesse mam portugisesche Staatssekretär fir auswäerteg Ugeleeënheeten a Kooperatioun, Francisco André. Am Mëttelpunkt stoungen hei europäesch Aktualitéits-Themen an déi bilateral Relatiounen am Beräich vun der Entwécklungszesummenaarbecht.

D'Corinne Cahen, Ministesch fir Famill an Integratioun, huet un engem Iesse mat der portugisescher Staatssekretärin fir d'Inklusioun vu Persoune mat enger Behënnerung, d'Ana Sofia Antunes, esou wéi mat der portugisescher Ministesch fir Aarbecht, Solidaritéit a sozial Sécherheet, der Ana Mendes Godinho, deelgeholl. An dësem Austausch stoungen haaptsächlech déi Lëtzebuerger a portugisesch Accessibilitéitspolitik am Mëttelpunkt. D'Ministesch Corinne Cahen huet ausserdeem déi portugisesch Staatssekretärin fir Gläichberechtegung a Migratioun, d'Isabel Almeida Rodrigues, getraff. Zu den Haaptsujeten, hunn hei déi vill Erausfuerderungen, déi d'Migratioun allgemeng mat sech bréngt, d'Situatioun an der Ukrain, an d'Situatioun vun den ukrainesche Flüchtlingen a Portugal gezielt. 

Donneschdeg, den 12. Mee 2022

Am Virmëtteg, goufen de Grand-Duc an d'Grande-Duchesse, zesumme mat der Ministesch fir Famill an Integratioun, Corinne Cahen, an der Fondatioun Champalimaud empfaangen, fir eng Visitt a Presenz vun der Presidentin vun der Stëftung, Leonor Balzar, an dem Vize-President, João Silveira Botelho. Dëse private Fuerschungszenter fir Biomedezin mat Sëtz zu Lissabon, promovéiert déi wëssenschaftlech biomedezinesch Fuerschung, besonnesch am Beräich vun der Kriibsfuerschung a vun den Neurowëssenschaften.

Den Aussen- an Europaminister, Jean Asselborn, hat e bilateraalt Gespréich mat sengem Homolog, dem Ausseminister vu Portugal, João Gomes Cravinho, an dem Staatssekretär fir europäesch Ugeleeënheeten, Tiago Antunes. Et handelt sech heibäi em dem Minister Asselborn seng éischt Entrevue mat sengen neie Kolleegen, säit dem Ufank vun hirer Amtszäit am Mäerz. Nodeems déi historesch an enk Bezéiunge vun deenen zwee Länner ervirgestrach goufen, hunn d'Ministeren Asselborn a Cravinho an de Staatssekretär Antunes sech iwwert d'Méiglechkeeten ënnerhalen, fir dës Bezéiungen an Zukunft nach weider ze stäerken, besonnesch am wirtschaftleche Beräich.

Op der Dagesuerdnung stoungen niewent de bilaterale Relatiounen, och d'Haaptsujete vun der europäescher an internationaler Aktualitéit, wéi de Krich an der Ukrain, d'Sanktioune géint Russland, d'Froe ronderëm d'Energieversuergung, d'Konferenz iwwert d'Zukunft vun Europa oder nach d'Migratioun. An dësem Kontext konnte grouss Gemeinsamkeeten tëschent Lëtzebuerg a Portugal a vill Beräicher nach eemol bestätegt ginn. 

Dono waren déi groussherzoglech Koppel zesumme mat de Ministere Jean Asselborn, Corinne Cahen, Franz Fayot a Yuriko Backes, an de Palais vu São Bento, dem Sëtz vum portugisesche Parlament, wou si vum President vun der parlamentarescher Versammlung, dem Augusto Santos Silva, empfaange ginn. Nom offiziellen Empfang mat militäreschen Éierungen an der Revue vun der Éieregarde, huet eng erweidert Reunioun mam President an den Deputéierte vun der parlamentarescher Versammlung stattfonnt.

De Forum économique Portugal-Luxembourg an déi multisektoriell Seminairen, déi vun der Lëtzebuerger Chambre de commerce an der portugisescher Agence fir Investissementer a Baussenhandel (AICEP) organiséiert ginn, stoungen am Mëttelpunkt vum zweeten Dag vun der Staatsvisitt. Dës Seminairen, déi sech ëm déi grouss zukunftsorientéiert Themen artikuléieren, wéi digital Wirtschaft, Weltaum, nohalteg Konstruktioun an Tourismus, hunn als Zil déi wirtschaftlech Relatiounen tëschent deenen zwee Länner ze stäerken, andeems engersäits Lëtzebuerger Entreprisë promovéiert ginn, déi versichen um portugisesche Marché Fouss ze faassen, an anersäits andeems nei Bezéiunge mat portugisesche Betriber opgebaut ginn. Souwuel déi groussherzoglech Koppel, wéi och de President vun der portugisescher Republik, hunn dëse Forum besicht. De Grand-Duc an de Marcelo Rebelo de Sousa hunn an dësem Zesummenhang d'Ofschlossriede vum Seminaire halen. Duerno koumen d'Interventioune vum Wirtschaftsminister Franz Fayot, der Finanzministesch Yuriko Backes, dem President vun der Chambre de commerce Luc Frieden, an dem President vun der AICEP, Luís Castro Henriques.

De Grand-Duc an d'Grande-Duchesse, zesumme mat der Ministesch fir Famill an Integratioun, Corinne Cahen, goufen duerno fir e Mëttegiessen an der offizieller Residenz vum Premier Minister vun der portugisescher Republik, an der São Bento Mansion, empfaangen. Dëst Iesse gouf vum portugisesche Premier, dem António Costa, offréiert.

De Wirtschaftsminister Franz Fayot gouf sengersäits vu sengem Homolog dem António Costa Silva fir en Aarbechtsiessen empfaangen, wärend d'Finanzministesch Yuriko Backes d'Ofschlossried vun engem wichtege Seminaire gehalen huet, dee vu Luxembourg for Finance organiséiert gouf.

Am Nomëtteg ass déi groussherzoglech Koppel zesumme mat der Ministesch Corinne Cahen op Cascais gereest, wou si vum President vun der portugisescher Republik, Marcelo Rebelo de Sousa, an dem Buergermeeschter vu Cascais, Carlos Carreiras, empfaange goufen.

Um Programm stoungen hei ë. a. eng Visite guidée vun der Expo "Portugal et Luxembourg – pays d'espoir en temps de détresse". Dës Expo retracéiert engersäits déi gemeinsam Linne vum Zweete Weltkrich fir déi portugisesch a lëtzebuergesch Bevëlkerung aus enger Perspektiv vu géigesäiteger Solidaritéit. Anersäits gëtt se och eng zäitgenëssesch Approche, déi et erméiglecht, den Impakt vun der portugisescher Immigratioun op déi physesch a sozial Landschaft vu Lëtzebuerg, souwéi d'Diversitéit an d'Stäerkt vun de Bezéiungen, ze verstoen, déi säit méi wéi engem hallwe Joerhonnert tëschent deenen zwee Länner bestinn. D'Visitt huet sech a Presenz vun de Kommissäre vun der Expositioun, der Margarida De Magalhães Ramalho a Luisa Pacheco, esou wéi vun de Kënschtler gemaach, déi zum Succès vun dësem wichtege Projet bäigedroen hunn, deen déi déif bilateral Relatiounen ervirhieft, déi d'Geschicht vu béide Länner zeechnen.

Duerno goung et weider an d'Casa Santa Maria, wou an der Zäit déi groussherzoglech Famill empfaange gouf. No der däitscher Invasioun, huet d'Grande-Duchesse Charlotte am Juni 1940, virun hirem Exil op London, tatsächlech wärend e puer Woche mam Prënz Felix an hire sechs Kanner zu Cascais gewunnt, esou wéi verschidde Membere vun der Regierung. A Presenz vun der Ministesch Corinne Cahen, deposéiert déi groussherzoglech Koppel e Blummekranz bei der Büste vun der Grande-Duchesse Charlotte, déi 2010 vun der groussherzoglecher Koppel bei hirer leschter Staatsvisitt u Portugal offréiert gouf.

Zesumme mat de Ministere Corinne Cahen, Franz Fayot a Yuriko Backes, gouf déi groussherzoglech Koppel duerno vum President vun der portugisescher Republik, Marcelo Rebelo de Sousa, an dem Direkter vun der Uni, João Sàágua, um Campus Campolide vun der Universidade NOVA de Lisboa empfaangen. An dësem Zesummenhang, krut de Lëtzebuerger Staatschef bei enger akadeemescher Zeremonie den Titel vum Dokter honoris causa decernéiert. D'Usprooch gouf vun der Vize-Dekanin adjointe fir international Bezéiungen an Inklusioun vun der Universitéit, der Ana Santos Pinto gehalen. Duerno huet de Grand-Duc als Laureat eng Ried gehalen, an um Schluss den Direkter vun der Uni.

Um Programm vun der Finanzministesch Yuriko Backes, stoung dann nach eng Visitt vum Fintech House Lisboa, organiséiert vun der Luxembourg House of Financial Technology (LHOFT). D'Fintech House Lisboa ass dee gréissten Zentrum fir Fintech, Insurtech, Regtech a Cybersécherheet a Portugal, an erméiglecht esou en Zougank zu Talenter, Kapital, Partner oder potentiell Clienten, an eng direkt Verbindung zu de Reguléierungsinstitutionen.

Um Ofschloss vun der Staatsvisitt huet dann eng Owesreceptioun am Sud Lisboa stattfonnt, déi de Grand-Duc an d'Grande-Duchesse zu Éiere vum President vun der portugisescher Republik offréiert hunn.

Communiqué vum Informatiouns- a Pressedéngscht vun der Regierung