Weltdag vum Häerz 2026

Am Kader vum 26. Weltdag vum Häerz, deen den 29. September 2026 stattfënnt, erneiert d'Santé hir Partnerschaft mat der Société luxembourgeoise de cardiologie (SLC) an der World Heart Federation, fir d'Bevëlkerung fir Häerz-Kreeslaf-Erkrankungen ze sensibiliséieren. De 26. September 2026 fënnt vun 10 bis 17 Auer e Public-Event op der Place d'Armes an der Stad Lëtzebuerg statt. "D'Gesondheet vun eisem Häerz fänkt am Alldag un. Mat dësem Sensibiliséierungsdag wëlle mir jidderengem einfach a konkret Tipps ginn, fir seng Häerz-Kreeslaf-Gesondheet ze schützen an esou méi Joren a gudder Gesondheet ze gewannen“, erkläert d'Martine Deprez, Ministesch fir Gesondheet a sozial Sécherheet.

Déi heefegst Doudesursaach weltwäit

Häerz-Kreeslaf-Erkrankunge bleiwen déi heefegst Doudesursaach weltwäit. Der Weltgesondheetsorganisatioun no si si fir méi wéi 42,5% vun den Doudesfäll responsabel, déi all Joer an Europa registréiert ginn. Zu Lëtzebuerg stoungen Häerz-Kreeslaf-Erkrankungen 2024 mat 1.006 Doudesfäll op der zweeter Plaz vun den Doudesursaachen, direkt hannert de Kriibserkrankungen. Dat entsprécht 23,3 % vun allen Doudesfäll.

En Informatiounsdag fir déi breet Ëffentlechkeet

E Samschdeg, de 26. September 2026, kënnen d'Visiteure sech iwwer Risikofacteure fir Häerz-Kreeslaf-Erkrankungen a präventiv Moossnamen informéieren. De ganzen Dag iwwer ginn et en Informatiounsstand an en interaktive Gesondheetsparcours. De ganzen Dag iwwer ginn et en Informatiounsstand an en interaktive Gesondheetsparcours fir d'Visiteuren.

Dës Initiativ ass Deel vum nationale Plang fir Häerz-, Kreeslaf- an neurovaskulär Krankheeten 2023–2027 (PNMCNV), deen d'Preventioun stäerken, de Screening an déi fréi Diagnos verbesseren an d'Betreiung vun de Patienten optiméiere soll.

Fir méi gewuer ze ginn, kann d'Ëffentlechkeet och d'Informatiounen um offizielle Site santesecu.lu consultéieren. Do gëtt et eng Rubrik iwwer Häerz-, Kreeslaf- an neurovaskulär Krankheeten, mat Informatiounen iwwer Symptomer, Risikofaktoren, Preventioun a Betreiung. Einfach Gesten, déi en Ënnerscheed maachen

• All Dag beweegen: 30 Minutte kierperlech Aktivitéit den Dag kënnen de Risiko fir Häerz-Kreeslaf-Erkrankungen ëm bis zu 80% reduzéieren.
• Ausgeglach iessen: Uebst, Geméis a Vollkornprodukter privilegiéieren, Salz, zougesaten Zocker an ultraveraarbecht Liewensmëttel limitéieren a gesond Fetter integréieren, zum Beispill fettege Fësch, Nëss an Olivenueleg.
• De Bluttdrock am A behalen: Héije Bluttdrock, deen dacks keng Symptomer verursaacht, ass ee vun de wichtegste Risikofaktoren. Reegelméisseg Kontrolle beim Dokter oder an der Apdikt si recommandéiert.
• Genuch schlofen: Op e gudden a qualitative Schlof an engem rouegen Environnement ouni Ecran oppassen.
• Net fëmmen: Och Alternativen zu Zigarette sinn net ouni Risiko.
• Alkohol vermeiden: Et gëtt keen Alkoholkonsum, deen ouni Risiko fir d'Gesondheet ass.

Méi zu dësem Thema

• Häerz-Kreeslaf-Erkrankungen an neurovaskulär Krankheeten: https://santesecu.public.lu/fr/espace-citoyen/departement-sante/maladies/cardio-neuro-vasculaires.html
• Statistiken zu den Doudesursaachen 2024: https://santesecu.public.lu/fr/actualites/2026/janvier/statistiques-des-causes-deces-2024-tumeurs.html
• WHO: https://www.who.int/europe/fr/news/item/15-05-2024-cardiovascular-diseases-kill-10-000-people-in-the-who-european-region-every-day--with-men-dying-more-frequently-than-women
• World Heart Federation: https://world-heart-federation.org/fr/what-is-cvd/

Communiqué vum Ministère fir Gesondheet a sozial Sécherheet