Gesetzesentworf iwwer interkulturellt Zesummeliewen an iwwer d'Ännerung vum ofgeännerte Gesetz vum 8. Mäerz 2017 iwwer déi Lëtzebuerger Nationalitéit

Dësen Text soll déi aktuell Approche vun der „Integratioun“ duerch eng méi breet an oppen Approche vum "interkulturellem Zesummeliewen" ersetzen. No enger breet ugeluechter ëffentlecher Consultatioun, gëtt duerch dëse Gesetzesprojet eng ausféierlech Neifaassung vun den Instrumenter vum interkulturellem Zesummeliewen méiglech an dat geännert Gesetz vum 16. Dezember 2008 iwwer d'Integratioun vun Auslänner zu Lëtzebuerg gëtt opgehuewen.

Méi genau soll dësen Text dat interkulturellt Zesummeliewen duerch folgend Instrumenter ëmsetzen:

1. den nationalen Aktiounsplang vum interkulturellen Zesummeliewen;
2. de "pacte citoyen" fir d'interkulturellt Zesummeliewen;
3. de Programm fir d'interkulturellt Zesummeliewen;
4. de Gemengepakt fir d'interkulturellt Zesummeliewen (Pakt vum Zesummeliewen).

Den nationalen Aktiounsplang definéiert d'Schwéierpunkter vum interkulturellen Zesummeliewen, déi politesch Richtlinnen an Ziler, grad esou wéi d'Aktiounen a Moossnamen, déi geholl musse ginn.

De pacte citoyen ass e moralescht Engagement dat Persounen, déi zu Lëtzebuerg wunnen oder schaffen ënnerschreiwe kënne fir ze weisen, datt si d'Wäerter vum interkulturellen Zesummeliewen deelen. Mat hirer Ënnerschrëft kréien si och Zougang zum Programm fir interkulturellt Zesummeliewen.

De Programm vum interkulturellen Zesummeliewen ersetzt den aktuelle "contrat d'accueil et d'intégration" an de "parcours d'intégration accompagné", fir esou e méi breede Katalog u Léiermoduler an Informatiounen iwwer de Grand-Duché unzebidden. Esouwuel Residente wéi och Grenzgänger hunn Accès zu dësem Programm. E gëtt reegelméisseg un d'Besoine vun de Leit déi am Land wunnen ugepasst, an zwar op der Grondlag vun enger Approche déi et de Participanten erlaabt, d'Funktiounsweis vum Land ze entdecken an deem se a Kontakt mat nationalen a lokalen Acteure bruecht ginn an an deem de Dialog an Austausch mat anere Persounen, déi zu Lëtzebuerg wunnen oder schaffe gefërdert gëtt.

De Gemengepakt vum interkulturellen Zesummeliewe soll d'Gemenge bei der Ëmsetzung vun hirer Strategie op lokalem Niveau ënnerstëtzen. Nieft finanziellen Hëllefen, wéi zum Beispill d'Bedeelegung un de Käschte fir e Paktkoordinateur oder fir d'Ëmsetzung vu Mesuren an der Gemeng, bitt de Pakt deene Gemengen déi en ënnerschriwwen hunn, och eng Begleedung duerch e Beroder fir interkulturellt Zesummeliewen un, wat an dësem Fall Staatsbeamte sinn.

Op nationalem Niveau soll mat dem Text e Conseil supérieur fir interkulturellt Zesummeliewe geschaf ginn, deen un der Ëmsetzung vum interkulturellen Zesummeliewe bedeelegt ass. Dëse soll den interministerielle Comité fir d'Integratioun an den nationale Conseil fir Auslänner ersetzen. Den neie Comité besteet aus Vertrieder vum Staat, vun der Zivilgesellschaft a vun de Gemengen. Dës Zesummesetzung soll garantéieren, datt déi Mesuren déi am Land agefouert ginn de Bedürfnisser vun der Gesellschaft gerecht ginn. Dobäi läit de Schwéierpunkt bei de Gemengen, wat domadder ze dinn huet, datt d'Hindernisser fir d'Zesummeliewe meeschtens op lokalem Niveau identifizéiert ginn an d'Eegenschafte vun all Regioun op de nationalen Niveau iwwerdroe musse ginn, fir esou eng koherent national Strategie ze garantéieren.

Um Niveau vun de Gemengen ersetzen déi kommunal Kommissioune fir interkulturellt Zesummeliewen déi aktuell kommunal Berodungskommissioune fir Integratioun. Zu hiren Aufgaben zielen d'Identifizéiere vu Prioritéiten a méiglechen Hindernisser am Beräich vum interkulturellen Zesummeliewen op kommunalem Niveau, d'Ënnerstëtze vun der Gemeng bei der Entwécklung an der Ëmsetzung vu Moossnamen an Aktivitéiten, déi dat interkulturellt Zesummeliewen op kommunalem Niveau fërderen, awer och den Zougang zu Informatioun, d'Biergerbedeelegung an d'Veräinsliewe z'ënnerstëtzen. D'Membere vun de Gemengekommissioune kënnen un de Walen zum Gemengevertrieder am Conseil supérieur deelhuelen. Et sinn och d'Membere vun de Kommissiounen déi d'Gemengevertrieder fir de Conseil supérieur wielen. D'Grenzgänger kënne Member an der Gemengekommissioun vun der Gemeng ginn, an där si schaffen.

An all de Mesuren an Organer, déi am Kader vun dësem Text agefouert ginn, ass de Kampf géint den Terrorismus an all aner Form vun Diskriminatioun um Niveau vun der Gemeng en zentraalt an iwwergräifend Element.

Den Text definéiert och déi finanziell Hëllefen déi de Staat am Beräich vum interkulturellen Zesummeliewen accordéiere kann. Dës kënnen a Form vun engem Subsid, enger finanzieller Bäihëllef zu de Funktiounskäschten oder den Investitiounsausgabe sinn.

Communiqué vum Ministère fir Famill, Integratioun an d'Groussregioun