Weltdag vun der Patientesécherheet 2026 – chronesch Krankheeten: de Parcours vum Patient sécher gestalten, vun der Preventioun bis zum Suivi

Wie mat enger chronescher Krankheet lieft, ass dacks bei verschiddene Fachleit a Behandlung, kritt ënnerschiddlech Behandlungen a muss reegelméisseg ënnersicht ginn. Eng spéit Diagnos, Informatiounen, déi net richteg weidergeleet ginn, oder eng Ënnerbriechung vum Suivi kënnen an all Etapp Auswierkungen op d'Gesondheet vun de Betraffenen hunn.

Am Kader vum Weltdag vun der Patientesécherheet, deen de 17. September ass, bedeelegt sech d'Gesondheetsdirektioun un der Campagne vun der Weltgesondheetsorganisatioun (WHO). D'Editioun 2026 steet ënnert dem Motto "Sécher Versuergung bei net iwwerdrobare Krankheeten" an ënnersträicht, wéi wichteg et ass, all Etapp vum Parcours sécher ze gestalten: Preventioun, Depistage, Diagnos, Behandlung a Suivi.

Eng sécher Versuergung bedeit, alle betraffene Persounen eng ugepasste Prise en charge ze bidden, déi op wëssenschaftlechen Erkenntnisser baséiert an op hir individuell Situatioun ofgestëmmt ass. Dozou gehéieren och kloer Informatiounen, d'Bedeelegung vun de Betraffenen an eng gutt Koordinatioun tëscht de verschiddene Fachleit.

Krankheeten, déi e laangfristege Suivi verlaangen

Net iwwerdrobar Krankheeten, och chronesch Krankheete genannt, si laangfristeg Erkrankungen, déi net vun enger Persoun op déi aner iwwerdroe ginn. Si entstinn duerch en Zesummespill vu geneteschen, physiologeschen, ëmweltbedéngten, sozioekonomeschen a verhalensbedéngte Facteuren.

Zu den heefegste chronesche Krankheeten zu Lëtzebuerg gehéieren ënner anerem Kriibs, Häerz-Kreeslaf- an Otemwee-Erkrankungen, Muskel- a Skelett-Erkrankungen, Depressioun, Demenz, Adipositas an Diabetes. Si triede mam Alter méi dacks op. Well d'Bevëlkerung ëmmer méi al gëtt, stellt dat eng grouss Erausfuerderung duer.

Duerch Preventioun de Risiko reduzéieren

D'Patientesécherheet fänkt schonn un, éier eng Krankheet optaucht. D'Preventioun soll de Risiko fir chronesch Krankheete reduzéieren oder dozou bäidroen, datt se méi spéit optrieden. Dobäi gëtt bei den Haaptrisikofacteuren ugesat.

Zu Lëtzebuerg gëtt et verschidden ëffentlech Preventiounsmesuren am Zesummenhang mam Tubak- an Alkoholkonsum, enger equilibréierter Ernärung a reegelméisseger kierperlecher Aktivitéit. Dës Mesurë baséieren op wëssenschaftlechen Erkenntnisser a ginn duerch zouverlässeg Informatiounen ënnerstëtzt. Si hëllefen de Leit, Entscheedungen ze treffen, déi gutt fir hir Gesondheet sinn, an de Risiko vu Krankheete reduzéieren.

Fréi erkennen, fir séier ze handelen

Duerch den Depistage kann eng Krankheet schonn an engem fréie Stadium erkannt ginn. Dobäi kënnen och éischt Unzeechen oder en erhéichte Risiko fir bestëmmten Erkrankunge festgestallt ginn.

Mat den nationalen Depistageprogrammer fir Broscht- an Daarmkriibs kënne méiglech Anomalie fréizäiteg erkannt ginn. Déi Betraffe kënnen duerno séier weider ënnersicht ginn an, wann néideg, eng ugepasste Prise en charge ugebuede kréien.

Donieft gëtt fir all Kanner am Alter vun 18 Méint e gratis nationalen Depistage vun der familiärer Hypercholesterolämie ugebueden. D'Zil ass et, dës ierflech Krankheet fréizäiteg ze erkennen a kardiovaskuläre Komplikatioune ze verhënneren.

Wann den Depistage no prezise Krittären a Qualitéitsprozeduren duerchgefouert gëtt, dréit en zur Patientesécherheet bäi. Opfälleg Resultater ginn esou konsequent suivéiert an déi Betraffe kënne séier un déi zoustänneg Fachleit weidergeleet ginn.

D'Prise en charge besser koordinéieren

Zu Lëtzebuerg sollen d'Kompetenznetzwierker d'Koordinatioun an d'Kontinuitéit vun der Versuergung vu Persoune mat chronesche Krankheeten oder komplexe Gesondheetsbesoine verbesseren. Si bréngen Dokteren, aner Fachleit a Gesondheetsariichtungen zesummen. Jee no Besoin ginn och aner Strukturen an Acteure mat agebonnen. D'Zil ass et, de Betraffenen de Wee duerch déi verschidde Strukturen ze vereinfachen an iwwer hire ganze Parcours eng gutt ofgestëmmte Prise en charge ze garantéieren. Eng besser Koordinatioun tëscht de verschiddenen Acteure kann dozou bäidroen, Informatiounsverloschter an Ënnerbriechunge vum Suivi ze vermeiden an esou d'Risiken am Zesummenhang mat enger schlecht ofgestëmmter Versuergung ze reduzéieren.

Zu dëse Kompetenznetzwierker gehéieren zum Beispill ParkinsonNet fir neurodegenerativ Krankheeten, de Réseau de Compétences en Immuno-Rhumatologie (RiR) fir Erwuessener a Kanner an OBEDIA-Kids fir Diabetes an Adipositas bei Kanner. Weider Netzwierker betreffe chronesch Péng souwéi Diabetes an Adipositas bei Erwuessenen.

Communiqué vum Ministère fir Gesondheet a sozial Sécherheet