Haaptfunktiounen

Als Exekutivorgan besëtzt d'Regierung en allgemenge Verwaltungspouvoir vun den ëffentlechen Ugeleeënheeten.

All Regierungsmember ass un der Spëtzt vun engem oder méi Departementer, an déi si vum Grand-Duc ernannt goufen. D'Ministeren iwwerhuelen an hire jeeweilegen Departementer d'Aufgaben, déi hinne vun der Verfassung, de Gesetzer an de Reglementer erdeelt ginn.

D'Regierungsmembere verfügen och iwwer e legislatiivt Initiativrecht, d. h. si kënne Gesetzesprojeten ausschaffen.

D'Verméigensverwaltung an d'Budgetsverwaltung falen och an den Zoustännegkeetsberäich vum exekutive Pouvoir, also vun der Regierung.

Legislatiivt Initiativsrecht

Am legislative System vu Lëtzebuerg kann eng Gesetzesinitiativ vun der Chamber, vun der Regierung oder vun der Wielerschaft a Form vun enger motivéierter Propositioun fir ze legiferéieren ausgoen.

Am Fall vun der legislativer Initiativ vun der Regierung schafft d'Zentralverwaltung e Virprojet aus, deen no Zoustëmmung vum Regierungsrot a Form vun engem Gesetzesprojet dem Staatsrot virgeluecht gëtt fir en Avis. De Projet gëtt mat enger Begrënnung, an där den zoustännege Minister d'Grënn fir de Projet erkläert, a mat Commentairen zu den Artikelen eragereecht. Den Avis vum Staatsrot gëtt der Regierung a Form vun engem begrënnte Rapport, Schlussfollgerunge mat abegraff, iwwermëttelt.

D'Regierung leet der Chamber den endgültege Projet vir.

D'Regierung reecht e Gesetzesprojet bei der Chamber zu deem Zäitpunkt eran, zu deem och de Staatsrot domat saiséiert gëtt. Dës Virgoensweis erméiglecht ënner anerem en ëffentlechen Debat, deen notamment den interesséierte Kreesser d'Méiglechkeet bitt, sech iwwert den, a Form vun engem parlamentareschen Dokument, verëffentlechte Projet ze äusseren, an zwar wärend dem ganzen Zäitraum bevir de Staatsrot säin Avis ofgëtt a virun der Instruktioun vum Projet an der Chamber.

Den Depot vum Gesetzesprojet erfollegt an der Form vun engem Arrêté vum Premierminister duerch deen de Minister fir d'Relatioune mam Parlament domadden beoptraagt gëtt, am Numm vum zoustännege Minister, de Projet bei der Chamber eranzereechen an de Staatsrot fir säin Avis ze saiséieren. Den Text vum Projet a seng Annexe ginn un d'Deputéiert verdeelt an de President vun der Chamber ordonéiert de Verweis vum Projet un eng oder méi Kommissiounen.

D'Regierung gëtt ausserdeem iwwert Gesetzespropositiounen informéiert a ka beurteelen, ob eng entspriechend Stellungnam zweckméisseg ass. Dës gëtt an der parlamentarescher Kommissioun diskutéiert.

Ab dem Verweis un d'Kommissioune gëllt souwuel fir d'Gesetzespropositioune wéi och fir d'Gesetzesprojeten déi selwecht Prozedur: de Rapport vun der Kommissioun gëtt de Membere vun der Chamber virgeluecht, déi ëffentlech iwwert de ganze Projet diskutéieren. All Member vun der Chamber kann un der Diskussioun deelhuelen oder eventuell Ännerungsvirschléi presentéieren.

Déi lescht Schrëtt bestinn aus der Ofstëmmung vum Gesetz an der Chamber an doropshin aus der Verkënnegung duerch de Grand-Duc.

D'Gesetz kann eréischt no senger Verkënnegung duerch de Grand-Duc an no senger Verëffentlechung am Journal officiel du Grand-Duché de Luxembourg a Kraaft trieden. D'Ëmsetzung vum Gesetz duerch d'Verkënnegung an d'Verëffentlechung fält haaptsächlech an den Zoustännegkeetsberäich vum exekutive Pouvoir. De Grand-Duc verkënnegt d'Gesetz, andeems hien um Enn vum Gesetzestext mat der Promulgatiounsformel ënnerschreift. D'Gesetz muss duerch e Regierungsmember géigegezeechent ginn, deen déi voll Verantwortung dofir iwwerhëlt.

Ausféierung vu Gesetzer

Den Artikel 45 vun der Verfassung gesäit Follgendes vir: "De Grand-Duc hëlt d’Reglementer an d’Arrêtéen, déi fir d’Vollstreckung vun de Gesetzer néideg sinn." Déi vum Grand-Duc erloosse Reglementer an Arrêtéë kënnen deementspriechend nëmme Moossname fir d'Ëmsetzung vun engem Gesetz sinn, an dierfen dem Gesetz net widderspriechen.

Laut Artikel 47 vun der Verfassung "[...] kann de Grand-Duc an de Fäll, déi hie festleet, d’Membere vu senger Regierung beoptragen, Ausféierungsbestëmmungen ze huelen.".

Budget

D'Verwaltung vum Staatsverméigen a vun den ëffentleche Finanze falen an den Zoustännegkeetsberäich vum exekutive Pouvoir.

Duerch déi järlech Ofstëmmung vum Budget an der Chamber behält d'Verfassung dem legislative Pouvoir allerdéngs eng wichteg Roll vir opgrond vu sengem Matsprooch- a Kontrollrecht. Wann d'Chamber sech weigert, de Joresbudget ze stëmmen, mécht se d'Gestioun vun den ëffentlechen Ugeleeënheete fir d'Regierung praktesch onméiglech.

De Staatsbudget gëtt a Form vun engem järleche Gesetz an no de Virschrëften, déi fir d'gesetzlech Prozedur am Fall vun der Initiativ vun der Regierung gëllen, festgeluecht. Et handelt sech ëm eng Geneemegung, wärend dem Exercice, fir deen de Budget gestëmmt gëtt, Recetten z'erzilen an Ausgaben ze tätegen.

D'Budgetsprozedur gesäit dräi Phase vir:

• en Debat iwwert d'budgetspolitesch Orientéierung am Kader vun der Ried zur Lag vun der Natioun wärend dem éischte Semester vun all Joer;
• en Debat iwwert d'Finanz- an d'Budgetspolitik am Kader vun der Iwwerpréiwung an Ofstëmmung vum Gesetzesprojet betreffend d'Recetten an d'Ausgabe vum Staatsbudget;
• en Debat am Kader vun der Iwwerpréiwung vum Gesetz fir d'Zoustëmmung vun den allgemenge Staatskonten.
  

Eng Verfassungsbestëmmung gesäit vir, dass de Budget an den allgemenge Staatskont all Joer a Form vun Dokumenter an der Chamber virgedroe musse ginn, déi all d'Recetten an d'Ausgaben zesummefaassen. D'Budgetsautorisatioune gëllen nëmme fir ee Kalennerjoer, fir der Chamber eng reegelméisseg Kontroll z'erméiglechen. Et kënne keng aner Budgetsprevisioune gi wéi déi, déi der Chamber fir d'Ofstëmmung virgeluecht ginn, an e Budgetskredit dierf nëmme fir eng bestëmmt Ausgab, fir déi de Kredit gestëmmt gouf, benotzt ginn.

D'Bereetstellung vu Staatsfongen opläit de Regierungsmemberen, déi d'Ausgaben unhand vu Bezuelungsunuerdnungen ordonéieren.

Den zoustännege Minister fir de Budget üübt e gewëssent Kontrollrecht iwwert d'Finanzverwaltung vun den anere ministeriellen Departementer aus, fir sécherzegoen, dass se hir finanziell Verflichtungen a weiser Viraussiicht beschléissen.

D'Finanzinspektioun ass an alle Beräicher vum staatleche finanzielle Liewe vertrueden: se spillt eng aktiv Roll beim Ausschaffen a Gestalte vum Budgetsprojet, bedeelegt sech un den Aarbechten am Zesummenhang mat der finanzieller, wirtschaftlecher a sozialer Planifikatioun an hëlt Stellung zu Projeten a Propositiounen, déi sech eventuell op d'Staatsfinanzen auswierke kéinten. Se féiert am Numm vum zoustännege Minister fir de Budget d'prealabel Kontroll vun der Wirtschaftlechkeet vun de budgetspoliteschen Duerchféierungsmoossnamen aus, andeems se hir Konformitéit mat der allgemenger Politik vun der Regierung iwwerpréift. Se intervenéiert deementspriechend däitlech virun enger Ausgab vun de Staatsfongen. Als Kontrollorgan iwwerwaacht se och d'Duerchféierung vum Staatsbudget, andeems se d'Mouvementer vun de Recetten an den Ausgabe verfollegt.

Den Tresor stellt d’Budgetscomptabilitéit an déi allgemeng Comptabilitéit op.

D'Haaptressourcë vum Staat ginn aus der Erhiewung vu Steieren, Rechter an Taxen ervir, déi respektiv der Steierverwaltung, dem Enregistrement an der Douane uvertraut ginn.Aner Ressourcë stamen aus Staatsrecetten, Staatsparticipatiounen an enger Rei Entreprisen an aus dem Betrib vu verschiddenen ëffentleche Servicer mëttels Peage.

Wann déi normal Staatsressourcen net duer ginn, fir déi ausseruerdentlech Ausgaben ofzedecken, ënner anerem fir d'Duerchféierung vun ëmfangräichen ëffentlechen Aarbechten (Eisebunnslinnen, Stroossen, Kanäl, grouss Neibauten), kann de Staat laangfristeg Prêten ophuelen. Allerdéngs kann ouni d'Zoustëmmung vun der Chamber kee Prêt zu Laascht vum Staat opgeholl ginn.

Ouni e Prêt opzehuelen, kann sech de Staat Ressourcen duerch d'Emissioun vu kuerzfristegen Tresorsbonge beschafen, déi der Deckung vu lafenden Ausgaben déngen, fir déi de Staat zäitweileg net genuch Liquiditéiten huet.

D'Bereetstellung vu Staatsfongen opläit de Regierungsmemberen, déi d'Ausgaben unhand vu Bezuelungsunuerdnungen ordonéieren.