Den 22. Mäerz 2022 huet de Minister fir Educatioun, Kanner a Jugend, Claude Meisch zesumme mam Prof. Dr Sascha Neuman vun der Uni Tübingen deen éischten "Nationale Bericht iwwert d‘Situatioun vun de Kanner" virgestallt.
De Prof. Dr Sascha Neumann ass ee vun den 3 Auteuren a Coordinateur vum éischte Kannerbericht. De Bericht ass d'Resultat vun enger Kooperatioun tëschent der Uni Lëtzebuerg, dem Luxembourg Institute of Socio-Economic Research (LISER) an der Eberhard Karls Universität Tübingen (D).
A senger Video-Introductioun huet de Claude Meisch betount, wéi wichteg et ass, de Kanner nozelauschteren: "Wa mer Politik fir Kanner wëlle gestalten, dann ass et och wichteg, se zu Wuert kommen ze loossen. Dëse Kannerbericht ass d’Stëmm vun de Kanner zu Lëtzebuerg."
De Kannerbericht stellt, genee ewéi vill aner Enquêten, déi den Educatiounsministère reegelméisseg an Optrag gëtt, e wichtegt Element vun enger op Fakte baséierter Bildungspolitik duer. De Kannerbericht besteet aus 2 Etuden, déi complementaire sinn: eng éischt Etude vun der Universitéit Lëtzebuerg iwwert déi non-formal Praxis an eng zweet representativ Enquête mam Luxembourg Institute of Socio-Economic Research (LISER), wou d'Kanner direkt befrot ginn zu hirem Wuelbefannen. Fir dës Etude goufen déi selwecht Kanner am Alter vun 8, 10 an 12 Joer an zwou Phase befrot an et ass fir d’éischt, datt zu Lëtzebuerg eng Etude an dëser Envergure gemaach gouf Déi éischt Phas war virun der Pandemie (2019) an déi zweet wärend der Pandemie (2021). Dës Etude hëlleft deemno ze verstoen, wat d’Auswierkunge vun der Pandemie op d’Wuelbefanne vun de Kanner sinn.
Am Fokus vum Kannerbericht 2022 steet d‘Wuelbefanne vun de Kanner an alle Situatiounen, an deenen si opwuessen an déi zu hirer Entwécklung bäidroen: sief et an der Schoul, an de Bildungs- a Betreiungsstrukturen, an der Famill oder an der Fräizäit. Analyséiert gouf, wéi zefridden d’Kanner mat hirem Liewen allgemeng respektiv mat bestëmmte Beräicher vun hirem Liewe sinn a wéi eng positiv oder negativ Gefiller an Erfarungen se domat verbannen.
Dat generellt Wuelbefanne vun de Kanner zu Lëtzebuerg bléift héich
2021 war (no 2020) op en Neits e Joer, dat duerch d’Covid-19-Pandemie de Kanner hiert Liewe staark ageschränkt huet. Et goufe Verännerungen a verschiddene Beräicher, mee allgemeng bleift dat subjektiv globaalt Wuelbefanne stabil. De Kannerbericht stellt fest, datt déi non-formal (Crèchen, Betreiungsstrukturen, asw.) a formal Bildung (an der Schoul) alle béid hire Bäitrag fir d’Wuelbefanne vun de Kanner leeschten.
Wichteg Roll vun der non-formaler Bildung beim Wuelbefannen
De Kannerbericht betount d’Bedeitung vun der non-formaler Bildung als wichtegen "sozialen Erfarungsraum" fir d'Kanner; et ass déi Plaz ausserhalb vun der Famill, wou Kanner sech begéinen, Frëndschafte schléissen a wichteg Erfarunge maachen am Grupp mat Gläichaltregen. Et war deemno vu grousser Bedeitung fir dës Strukturen, och wärend der Pandemie sou normal wéi méiglech kënnen ze fonctionéieren.
D'Regierung huet an de leschte Jore wichteg Reformen an d’Weeër geleet fir den Zougang zur non-formaler Bildung ze fërderen an d‘Qualitéit vun de Bildungsofferen ze verbesseren: De Programm fir eng méisproocheg Erzéiung an déi deelweis gratis Betreiung vu Kanner vun 1-4 Joer hunn dozou gefouert, datt Lëtzebuerg um internationale Plang ee vun den erschwénglechste Kannerbetreiungs- an Educatiounssystemer ginn ass, dat Famille finanziell entweder ganz oder ganz staark entlaascht.
An dëser Kontinuitéit gëtt vun der Rentrée un déi deelweis gratis Betreiung vun de Schoulkanner agefouert.
D’Matbestëmme vun de Kanner weider ausbauen
Eng vun de Conclusiounen aus dem Kannerbericht ass, datt d’Matbestëmmungsméiglechkeete vun de Kanner an d’Wësse ronderëm d’Kannerrechter nach ausbaufäeg sinn.
Am nationale "Rahmenplan" vun der non-formaler Bildung (Cadre de référence national sur l'éducation non formelle des enfants et des jeunes), deen 2016 iwwert d’Jugendgesetz agefouert gouf, gouf d'Participatioun als wichtegen iwwergräifende pedagogesche Prinzip verankert. Et wäerten an deenen nächste Méint Echangë mat de Vertrieder aus der non-formaler Bildung stattfannen, fir iwwer weider Méiglechkeete vu Matbestëmmung a Participatioun vun de Kanner a Jugendlecher nozedenken. Och um kommunale Plang wäerten Initiative geholl ginn, fir d’Matbestëmmung vun de Kanner ze ënnerstëtzen a Modeller vu Participatioun fir den nationale Plang auszeschaffen.
D’Erkenntnisser vum Kannerbericht ginn och a Form vun engem "Kannerbuch" esou opgeschafft, datt se fir all d’Kanner zougänglech sinn, esou datt d’Kanner hir Rechter op Matbestëmmung an der Gesellschaft kenneléieren an iwwert hiert Wuelbefanne kënne reflektéieren.
D’Famille weider stäerken
De Kannerbericht bestätegt, datt d’Famill e wichtege Facteur fir d’Zefriddenheet an d'Wuelbefanne vun de Kanner ass. Dofir ass et och weiderhi wichteg, d‘Famillen z'ënnerstëtzen an z'entlaaschten.
E wichtege Projet an dësem Kontext sinn d’Eltereforen, déi an noer Zukunft an d’Liewe geruff ginn. Hei ginn d'Elteren empfaange fir hir Froen ze thematiséieren a fir si iwwer déi verschidden Ënnerstëtzungsméiglechkeeten z'informéieren. Dëst ass eng Offer fir all Famillen, fir se beschtméiglech doranner ze ënnerstëtzen, hir Kanner an deene verschiddene Liewensphasen ze begleeden. D’Situatioun doheem huet e groussen Impakt op d’Wuelbefanne vun de Kanner.
D’Wuelbefanne weiderhin am Fokus vun den Etuden
De Kannerbericht liwwert wichteg an nohalteg Daten, déi een och weider analyséieren a mat aneren Donnéeë vergläiche kann. Esou wier et interessant, dës Daten iwwert d’Wuelbefanne vun de Kanner mat deenen iwwer d'"Réussite scolaire" ze vergläichen an Zesummenhäng hierzestellen.
Eng weider Etüd iwwer d'Wuelbefanne vun de Kanner wäert an deenen nächste Woche vum Observatoire national de la qualité scolaire publizéiert ginn.
Communiqué vum Ministère fir Educatioun, Kanner a Jugend