D'Regierung engagéiert sech fir digital Accessibilitéit

Aleedung

D'Digitaliséierung vun den ëffentlechen Déngschter ass eng Erausfuerderung, där Lëtzebuerg sech zënter e puer Joer stellt. An dësem Kontext stäipen sech ëffentlech Organismen ëmmer méi op den Internet fir eng breet Palette vun essentiellen Déngschter fir eis Gesellschaft ze liwweren. D'Gläichheet ass ee vun de fundamentale Prinzippie vun enger Demokratie, dofir mussen all digital ëffentlech Servicer wéi Websäiten a mobil Appe vun ëffentlechen Administratiounen d'Fuerderung vun der Net-Diskriminéierung vun de Benotzer erfëllen, besonnesch am Beräich vun de Behënnerungen.

An dësem Sënn huet Lëtzebuerg den 13. Dezember 2006 d'Konventioun vun de Vereenten Natioune fir d'Rechter vun de Leit mat Behënnerunge ratifizéiert, déi den Zougang fir d'Leit mat Behënnerungen op nei Informatiouns- a Kommunikatiounstechnologien ënnerstëtzt, an domat besonnesch d'Accessibilitéit vum Web a vu mobillen Appen. Dës Accessibilitéit vum Web gouf vum WAI (Web Accessibility Initiative) folgendermoossen definéiert:

"D'Accessibilitéit vum Web bedeit, datt d'Leit mat Behënnerungen de Web benotze kënnen. Fir genau ze sinn, datt se den Internet gesinn, verstoen, navigéieren, mat em interagéieren a bäidroe kënnen. D'Accessibilitéit vum Web profitéiert awer och aneren, wéi eeler Leit, deenen hir Fäegkeeten am Alter änneren. D'Accessibilitéit vum Web ëmfaasst all Behënnerungen déi den Zougang zum Web beaflossen, wéi visuell, auditiv, kierperlech, sproochlech, kognitiv an neurologesch Behënnerungen.”

D'Approche vun der digitaler Accessibilitéit erméiglecht also eng besser Liewensqualitéit dank engem méi einfachen Zougang zu ëffentlechen Déngschtleeschtungen, an ass an dësem Sënn och eng Prioritéit vun der Regierung. Den Informatiouns- a Pressedéngscht (SIP) ënnerstëtzt seng Implementéierung.

Missioune vum SIP

De SIP ass verantwortlech fir d'Accessibilitéit vun de Websäiten an de mobillen Appe vun ëffentlechen Administratioune reegelméisseg ze kontrolléieren. Dës Kontrolle ginn a Form vu reegelméissege Berichter un d'Europäesch Kommissioun weiderginn. De SIP fungéiert och als Ulafstell fir all Reklamatiounen iwwert d'digital Accessibilitéit vu Websäiten oder mobillen Appen a Consultatioun mat de betraffenen ëffentlechen Administratiounen (kuckt d'Rubrik "Reklamatiounen” hei ënnen). Schlussendlech huet de SIP eng Missioun ze informéieren, ze sensibiliséieren an d'Entitéiten aus dem ëffentleche Secteur ze forméieren iwwert d'Thema vun der digitaler Accessibilitéit.

Reklamatiounen

Wann Dir e Mangel un Accessibilitéit op engem Site oder enger mobiller App vun enger lëtzebuergescher ëffentlecher Entitéit bemierkt, kontaktéiert eis wannechgelift via dëse Reklamatiounsformulär. Mir verflichten eis dozou Iech per E-mail innerhalb vun engem Mount ze äntweren. Dir kënnt och déi betreffend Organisatioun iwwer hir Kontakt-Säit informéieren, déi op hirem Site verfügbar ass, oder och den Ombudsmann, Mediateur vum Grand-Duché vu Lëtzebuerg.

Juristesche Kader a Standarden

Um europäeschen Niveau sinn d'Accessibilitéitsbestëmmunge fir Sitten an Appen am ëffentleche Secteur an der Direktiv 2016/2012 beschriwwen. Dës Direktiv gouf am nationale Recht duerch d'Gesetz vum 28. Mee 2019 iwwert d'Accessibilitéit vu Websäiten a mobillen Appe vun Organismen aus dem ëffentleche Secteur, transposéiert. D'Lëtzebuergescht Gesetz an d'europäesch Direktiv baséieren sech op d'europäesch Norm "EN301 549 V2.1.2 (2018-08) "Accessibility requirements for ICT products and services", déi technesch an um europäeschen Niveau harmoniséiert Ufuerderunge fir d'Accessibilit ubitt. Wat d'Websäiten ugeet, formaliséiert dës europäesch Norm d'Recommandatioune vum WCAG 2.1 Standard vum W3C. 

Délaien

Déi legal Frist fir d'Konformitéit mat den Accessibilitéitsnorme sinn déi folgend (kuckt den Artikel 9 vum uewen ernimmte Lëtzebuergesche Gesetz vum 28. Mee 2019):

• D'Websäite vun Administratiounen aus dem ëffentleche Secteur, déi nom 23. September 2018 publizéiert goufen, musse spéitstens bis zum 23. September 2019 a Konformitéit bruecht ginn.
• D'Websäite vun Administratiounen aus dem ëffentleche Secteur, déi virum 23. September 2018 publizéiert goufen, musse spéitstens bis zum 23. September 2020 a Konformitéit bruecht ginn.
• D'mobil Appe vun Administratiounen aus dem ëffentleche Secteur musse spéitstens den 23. Juni 2021 a Konformitéit bruecht ginn.

Kontakt

Dir kënnt eis fir all Froen zur digitaler Accessibilitéit op dëser Adress kontaktéieren: accessibilite@sip.etat.lu