Regierungsrot

Déi verfassungsrechtlech Legitimitéit vum Regierungsrot berout op de Bestëmmunge vum Kapitel V vun der Verfassung. D'Organisatioun vun der Regierung, wéi se am Artikel 92 vun der Verfassung virgesinn ass, gëtt duerch den interne Reglement vun der Regierung gereegelt.

De Regierungsrot kënnt wéchentlech am Staatsministère (Hôtel St Maximin), dem Sëtz vun der Regierung, zesummen, fir iwwert all d'Ugeleeënheeten ze beroden, déi vum Premierminister, dem President vum Regierungsrot, um Ordre-du-jour festgeluecht ginn. All d'Ministere kënnen de Regierungsrot mat enger Ugeleeënheet, déi hiert Departement betrëfft, befaassen.

Iwwert all d'Ugeleeënheeten, déi dem Groussherzog ënnerbreet ginn, muss am Virfeld am Regierungsrot berode ginn. De Regierungsrot beréit och iwwert Gesetzesprojeten, déi bei der Chamber eragereecht ginn.

Den interne Reglement gesäit vir, dass déi vun der Regierung am Regierungsrot getraffen Decisioune per Majoritéitsofstëmmung geholl ginn. Bei Stëmmegläichheet ass d'Stëmm vum President, also vum Premierminister, ausschlaggebend. An der lëtzebuergescher politescher Traditioun ginn d'Decisioune vum Regierungsrot allerdéngs am Konsens geholl, sou dass eng Ofstëmmung nëmmen an Ausnamefäll stattfënnt.

D'Verantwortung fir all déi am Regierungsrot getraffe Moossnamen opläit all de Regierungsmemberen, déi un dëser Moossnam matgewierkt hunn. De Minister, deen seng Géigestëmm am Protokoll vun der Sëtzung vum Regierungsrot feststelle gelooss huet, gëtt allerdéngs vu senger Verantwortung entbonnen.

De Regierungsrot gëtt vum Generalsekretariat vum Regierungsrot, ee vum Premierminister ofhängege Service, ënnerstëtzt. De Generalsekretär vum Regierungsrot sou wéi de stellvertriedende Generalsekretär gi vun der Regierung ënner den héije Fonctionnairen ausgewielt. Si kënnen zu all Moment ofgesat ginn, an hir Amtszäit endegt mam Enn vum Regierungsmandat.

De Generalsekretär vum Regierungsrot bereet d'Sëtzunge vum Regierungsrot vir, hëlt dorun deel, dresséiert de Protokoll vun de Sëtzungen a suergt fir d'Duerchféierung vun den Decisioune vum Rot. De Regierungsrot kann hien ausserdeem nach mat aneren Aufgabe beoptragen.